ऊर्जा राज्यमंत्री प्राजक्त तनपुरे यांचे महावितरण ला निर्देश

ऊर्जा राज्यमंत्री प्राजक्त तनपुरे यांचे महावितरण ला निर्देश 

 ग्राम विद्युत व्यवस्थापकांच्या मानधनात दोन हजार रुपयांनी वाढ

मुंबई ,

थंडी, उन, वारा, पाऊस या अस्मानी संकटात मानधनावर काम करणाऱ्या राज्यातील ग्राम विद्युत व्यवस्थापकांच्या मानधनात वाढ करण्याचे निर्देश ऊर्जा राज्यमंत्री प्राजक्त तनपुरे यांनी महावितरणला दिलेत.त्यानुसार शुक्रवार २६ नोव्हेंबर पासून ग्राम विद्युत व्यवस्थापकांच्या मानधनात दोन हजार रुपयांची वाढ करण्याची अंमलबजावणी होत आहे.त्यानुसार आता या कर्मचाऱ्यांना ३ हजार रुपयांवरून ५ हजार रुपये मानधन मिळणार असल्याचं महावितरण ने प्रसिद्धीस दिलेल्या वृत्तात नमूद केलंय.

ऊर्जा राज्यमंत्री प्राजक्त तनपूरे यांनी ग्राम विद्युत व्यवस्थापकांच्या कामाचे स्वरूप पाहून म.रा.वी.मं. सुत्रधारी कंपनीच्या कार्यालयामध्ये नुकतीच बैठक घेतली. या बैठकीस महावितरणचे संचालक संजय ताकसांडे , संचालक भालचंद्र खंडाईत उपस्थित होते.

 तीन हजार लोकसंख्या असणाऱ्या ग्रामपंचायतींमध्ये महावितरणकडून काही सेवा पुरविण्यासाठी फ्रेन्चायझी तत्त्वावर ग्राम विद्युत व्यवस्थापकांची नियुक्ती करण्यात आली. त्यांना प्रतिमाह ३ हजार रुपये मानधन देण्यात येत होते. कामाच्या तुलनेत मानधन कमी असल्यामुळे ग्राम विद्युत व्यवस्थापकांनी ऊर्जा राज्यमंत्री तनपुरे यांच्याकडे मानधनात वाढ करण्याची मागणी केली होती. त्यानुसार  ग्राम विद्युत व्यवस्थापकांच्या मानधनात २ हजार रुपयाची वाढ करण्यात आली असून याचा लाभ राज्यातील ५०० हून अधिक ग्राम विद्युत व्यवस्थापकांना मिळणार आहे. शुक्रवार २६ नोव्हेंबर पासून ही वाढ लागू झाली आहे. अशी माहिती महावितरण ने या वृत्तात दिलीय.

ऊर्जा राज्यमंत्री तनपुरे यांनी  ग्राम विद्युत व्यवस्थापकांच्या मानधनात केलेल्या वाढीबाबत   ग्राम विद्युत व्यवस्थापक अण्णासाहेब चौभे, महेश तुपे व इतर ग्रामविद्युत व्यवस्थापकांनी तसेच   ग्राम विद्युत व्यवस्थापकांनी ऊर्जा राज्यमंत्री प्राजक्त तनपुरे यांचे  आभार मानलेत.